Монгол улсын аж үйлдвэрийн салбарын оргил үеийг 1980-1989 оноор тодорхойлдог нь бид улсдаа өргөн хэрэглээний бүхий л зүйлсийг үйлдвэрлэхийн сацуу олон улсын жишигт нийцсэн төрөл бүрийн эрдэсээс боловсруулах үйлдвэрүүд ажиллуулдаг байв. Үүнээс хойш 30 гаруй жил өнгөрсөн хэдий ч бид 1990 оны хувьчлалаас хойш аж үйлдвэрлэлийн салбарт онцгой хөгжил харж чадалгүй эрдсээс боловсруулах үйлдвэрлэлийн өсөлт үндэсний хэмжээнд 2.5 хувиар буурсан чамлахаар дүнтэй угтаж байна. Харин, аль ч салбарт инноваци хөгжлийг өөрсдийн гараар шантаршгүй бүтээж ирдэг хувийн хэвшлийнхний хөдөлмөрч хамт олны ачаар манай улсын хөгжлийн зураглал өнөөдрийн төвшинд ирсэн билээ. 

Манай хамт олон нь 1990 оноос хойш улсынхаа анхны бөгөөд цор ганц эрдсээс хайлуулах боловсруулах үйлдвэрлэл технологийн салбарт 100% хувийн хөрөнгө оруулалттай “ЧИН” нөхөрлөл хоршоо хэмээх салхины шилний үйлдвэрийг бүтээн байгуулж, дотоодынхоо автобус болон машин техникийн салхины шилний хэрэгцээг дан ганц хангах технологийг нэвтрүүлж ирсэн бүлтээлч түүхтэй хамт олон юм. Дотоодын инженерийн боловсон хүчний чадамжийг хөгжүүлэн, өндөр температурт эрдэс хайлуулах технологийг ОХУ-аас бүрэн эзэмшин 10-аад жилийн хугацаанд өөрсдийн гараар хөгжүүлэн үйлдвэрлэж ирсэн нь чамлахгүй амжилтад тооцогдох байх.

Ийнхүү, 2000-аад оны эхээр дэлхий нийтийн хүн амын нягтшилыг дагасан барилга бүтээн байгуулалтын хөгжлийн зэрэгцээ манай улсын хөгжлийн бас нэгэн эрин үе ирэхэд бид өөрсдийн эзэмшсэн эрдсээс хайлуулах технологийн туршлагадаа суурилуулан, дэлхийн тавцанд өрсөлдүүлэх шинэ төрлийн бүтээгдэхүүн болох чулуун хөвөн дулаалгын материалын үйлдвэрийн төслийн техник эдийн засгийн судалгааны ажлыг эхлүүлсэн байдаг. Ингэж бид хүнд аж үйлдвэрлэлийн боловсруулах салбарт орон нутгийн түүхий эдийн нөөцөд түшиглэсэн чулуун хөвөн дулаан тусгаарлагчийн үйлдвэр технологийг амжилттай нутагшуулан улсынхаа анхны бөгөөд цор ганц чулуун хөвөнгийн үйлдвэрийг бүтээн байгуулсан байдаг.

 Өдгөө, Монгол Базальт ХК хэмээх олон нийтийн компани болж, BASALTWOOL® брендийг 15 жил хөгжүүлэн олон улсад бүртгэлтэй патент, зохиогчийн эрхийг эзэмшин, Монгол улсынхаа хөгжлийн түүгчээ, эдийн засгийн тэргүүлэх чиглэл бүхий барилга, дэд бүтэц, эрчим хүч, стратегийн онц чухал байгууллагуудад үндэсний бүтээгдэхүүнээ нийлүүлэн ажиллаж байна. Өнөөдөр манай компани нь металл бус боловсруулах хүнд үйлдвэрлэлийн салбарт 2000^оС градус температур гаргадаг зуухтай дотоодын ганц үйлдвэр бөгөөд Европын галын А1 зэрэглэлийн стандартад МУ-аас дангаараа нийцдэг тусгай бүтээгдэхүүн үйлдвэрлэж байна. Мөн түүнчлэн манай бүтээгдэхүүн нь байгаль орчин, хүн нийгэмд ээлтэй, нүүрс хүчлийн хий, түүний ул мөрийг бууруулах, эрчим хүч, дулааны хамгийн их хэмнэлт үүсгэх, чанарын эрсдэлгүй үндэсний тогтвортой бүтээн байгуулалтуудыг дэлхийн чанар үзүүлэлтэд нийцүүлж буй стратегийн онц чухал бүтээгдэхүүн юм.

Өнгөрсөн 30 жилий хугацаанд хүнд аж үйлдвэрлэлийн эрдсээс боловсруулах салбарт орон нутгийн түүхий эдийн нөөцөд түшиглэсэн технологийг хөгжүүлснээр дотоодын инженерийн боловсон хүчний чадамжийг олон улсын тавцанд өрсөлдүүлж, улсынхаа хэмжээнд өндөр температурт боловсруулах үйлдвэрлэл технологийн хөгжлийг олон арван жилээр урагшлуулсан амжилтыг бий болгосон байна. Энэ хугацаанд инноваци шинэчлэлийг нэвтрүүлэх хүнд ажлыг нуруун дээрээ үүрч, хамтдаа хөгжиж, амжилтыг бүтээлцэж ирсэн хувь эзэмшигч нартаа, ажилчид хамт олондоо, хамтрагч байгууллагууддаа улсынхаа эрдсээс боловсруулах салбарын хөгжилд үнэ цэнтэй хувь нэмрээ оруулж ирсэн хагас жаранг угтаж, цаашдийн улс орныхоо хөгжил дэвшлийн төлөө олон жил хамтдаа зүтгэхийг ерөөе. 

ХҮНДЭТГЭСЭН                                ТУЗ-н ДАРГА       Л. АРИУНБОЛД